سابت عياله ولملمت حاجاته
فى دقشا ضلام عزالصباح...
فى عتبة الباب القديم وقفت
تناجى فى سرها استرها يارب الفلاح..
هون على اللقمه لى ايتام ضعاف
حق الفطور فى المدرسه وحق الملاح..
وارزقنى بى لطفك حلال واحمينى
من الحاجه يامهون على درب الكفاح..
قوينى يارب يا كريم واستر عيالى من
الشرور واديهم العز والنجاح...
طلعت مشت خطواته تحسب فى
الطريق وراسه يحسب فى
الديون حق الإيجار ودكان صلاح...
وكمان رسوم المدرسه هماً
تقيل احاول اخش خته صباح...
وبين خاطره وخته صباح
وصلت لقت شارع الظلت
مليان بى زملان الكفاح ..
*****************
ركبت على السوق الكبير
وصلت قبيل لى ركنها وبدت
العمل ولعت كانونه رصت عدتها
ومرت على كل الكبابى تتمرا
فى شموخه قاعده تقول جبل ...
وناديه ماكبرت خلاص بت شابه
فى التلاتين جميله تقول بدر بعداكتمل ...
وأدوها بى عدم العلم وادوها لى
اول خطيب ضروها بى عرس الجهل...
فى الاخر الراجل طفش تعمل شنو !!!
تلوم الظروف ......... ولا الاهل؟
اطفاله سته ومافى كافل اوقريب
اواخ مهاجر يبقى ليها بصيص امل ...
وزى ناديه آلاف .... بل ملايين النساء
فى بلادنا ....... كايسات الحلل ..
يا حكومه.. ياناس النظام
بالله ادوهن حلل.!!!
كم اسره فقدت لى المعيل
وقادت نساها الدفه باستبسال ..
وعلمن العيال وبقن كمان مضرب مثل ..
كم من جنود إستشهدو !!!
وكم من رجالاً معسرين
سابو البلد كايسين
عمل وفقدو الأهل !!!
كان المجاعة او الحروب
والبعض بفعل النزوح
أصبح يتيم من غير معيل
أفتونا هل من وقفة هل!!!!
أشرف نساء من كابدن
جمر الحياة وحر الهجير
وربن عيالن وما شكن
ما حملن قسوة ظروفن للاهل
ربن عيالن وعلمن
وحلمن ببكرة يبدل الحال والزمن
صبحن رموز للعفة والعزة
وبقن مضرب مثل ........